Korporaasjes ynvestearje 12,6 miljoen euro yn Opsterlân

De gearwurking tusken korporaasjes, hierdersorganisaasje en de gemeente Opsterlân wurdt al jierren as sterk ûnderfûn. Dy mienskiplike koers is neffens de partijen essinsjeel yn in tiid fan lanlike ûnrêst oer hierbelied, ynvestearringsmooglikheden en nije wetjouwing. 

Santich nije wenten

De 12,6 miljoen euro wurdt ynvestearre yn ferskate tema's. Yn 2026 rûnet Elkien de bou fan 40 nije wenten ôf en is de ferwachting dat der start wurdt mei de bou fan 30 apparteminten. Ek ûndersykje partijen in nije lokaasje yn Oerterp. Om de bou-opjefte oant en mei 2030 te realisearjen, meitsje partijen hjirôfspraken oer yn in nijboukonvenant. Betelberens bliuwt in spearpunt: troch ferduorsuming sakje de enerzjylêsten en fia 'betiid sinjalearjen' wurde finansjele problemen by hierders earder oppakt.

Gearwurkje oan noflik wenjen

De gearwurkjende partijen sette sterk yn op ferduorsuming. Yn 2026 ferduorsumet Elkien 29 wenten nei minimaal label C. WoonFriesland rûnet ferlykbere wurksumheden ôf en rjochtet him dêrnei op fierdere ferduorsuming fan har besit rjochting label A; yntusken hat al 70% fan har wenten enerzjylabel A of B. De wenten fan Woonzorg Nederland yn Opsterlân beskikke al oer enerzjylabel A. Leefberens, biodiversiteit, enerzjysunich wenjen en stipe fan kwetsbere groepen krije likegoed in sintraal plak. Foar âlderen en oare omtinkensgroepen wurdt yn 2026 wurke oan in útfieringsaginda Wenjen, Soarch en Wolwêzen.

Wethâlder Marcel van Opzeeland is bliid mei de nije prestaasjeôfspraken: “Mei dizze prestaasjeôfspraken sette wy op'e nij in stevige stap om wenjen yn Opsterlân betelber, duorsum en berikber te hâlden. De mienskiplike ynvestearring fan 12,6 miljoen euro lit sjen dat korporaasjes en gemeente deselde ambysje diele: soargje foar foldwaande goede wenten foar ús ynwenners, no en yn de takomst.”