Duorsumenswykein Opsterlân wie in sukses

Advys oer wenningferduorsuming

Wenningeigners koene by de mobile showroom fan Duorsum Bouwloket enerzjybesparjende produkten lykas waarmtepompen, ynfrareadpanielen, sinnepanielen, fentilaasjeboksen, in thúswinning en isolaasjematerialen besjen en ûnderfine. 

Yn Oerterp kamen ynwenners rjochte nei de showroom dy't stie by MFC De Wier. Sneon yn Gordyk wie der ek in soad oanrin fan winkeljend publyk by de stân op it pleintsje oan de Skânsburch. De adviseur fan Duorsum Bouwloket en ús gemeentlike enerzjyferkenners hawwe op it plak fragen beäntwurde oer isolaasjemaatregels en de finansiering dêrfan. Ek binne der ferfolchôfspraken pland foar húsbesiken om ynwenners thús te advisearjen. 

Enerzjyferkenners

Wol jo ek in advysgesprek? De enerzjyferkenners steane altyd klear om jo te helpen.

Nim kontakt op mei in enerzjyferkenner

De enerzjyferkenners:

• sjogge mei jo mei hoe't jo jo wenning ferduorsumje kinne;
• helpe mei formulieren, advizen en offertes;
• ferkenne tegearre mei jo de finansieringsmooglikheden.

Wol jo witte oft jo yn oanmerking komme foar isolaasjesubsydzje? 

Lês mear oer de Isolaasje-aksje Opsterlân

Frijwillige Enerzjycoaches en Enerzjyfixers klusten by minsken thús

Klusteams besteande út in enerzjycoach en in enerzjyfikser besochten húshâldens om besparprodukten te pleatsen. By 42 wenten yn Gordyk en Oerterp hawwe sy besparjende maatregels oanbrocht. By de iene wenning plakten sy radiatorfoly efter de radiatoren yn de wenkeamer, by in oare wenning waarden de lampen fan 100 Watt yn de gong, de wenkeamer en it toilet ferfongen troch ledlampen fan 6 Watt. Ek wiene der wenten dêr't tochtstrips yn de binnendoarren nedich wiene om hinderlike tocht foar te kommen. Mei dizze maatregels besparje ynwenners op harren enerzjyrekken, mar harren wenning wurdt ek komfortabeler.

As gemeente binne wy tige bliid mei it team fan Enerzjycoaches en Enerzjyfixers. It binne goed oplate ynwenners dy't har frijwillich ynsette om doarpsgenoaten te helpen enerzjy te besparjen. Kinne jo ek tips brûke by enerzjybesparring? Of hawwe jo help nedich by it oanbringen fan besparjende produkten? Dan kinne jo kontakt opnimme mei de Enerzjycoach út jo doarp.

Nim kontakt op mei de Enerzjycoaches

Duorsumenswykein wie slagge

Yn it wykein holpen meiwurkers fan wenningkorporaasjes Elkien en WoonFriesland hierders mei harren fragen. Yn Oerterp pleatsten faklju tochtstrips op bûtendoarren en diene oare putsjes yn de hierwenten. De budzjetcoach fan de gemeente stipe ynwenners by jildproblemen en ferwiisde troch nei passende oplossingen. Yntusken koene ynwenners mei in bakje kofje en in koekje yn petear mei de buertopbouwer oer harren buert.

Dit duorsumenswykein waard foar it earst organisearre. Wy hawwe in soad ynwenners sprutsen en holpen en sjogge oft wy it yn de takomst nochris organisearje kinne.