Learplicht
De Learplichtwet soarget derfoar dat elk bern oant syn 16e jierdei nei skoalle giet en op in skoalle stiet ynskreaun.
As in bern 4 jier is, mei it nei skoalle. Bern fan 5 oant en mei 16 jier binne learplichtich. Alders of fersoargers binne ferantwurdlik dat bern nei skoalle geane. Skoallen binne ferplichte spijbeljende learlingen te melden by de gemeente, nei op syn letst 3 opienfolgjende ferzuimdagen of wannear't de learling yn 4 opienfolgjende leswiken mear as 3 dagen byinoar opteld ferzuimd hat. Alle bern bliuwe learplichtich oant it ein fan it skoaljier wêryn't se 16 wurde. Dêrnei wurde se kwalifikaasjeplichtich. Dit betsjut dat jongerein sûnder startkwalifikaasje oant harren achttjinde nei skoalle moatte. In havo- of vwo-diploma of in mbo-diploma fan nivo 2 ôf is in startkwalifikaasje.
Frijstelling fan learplicht
Jo bern kin frijstelling fan de learplicht krije, sadat hy of sy net mear nei skoalle hoecht. Dit kin allinnich yn de folgjende gefallen:
- by lichaamlike of psychyske ûngeskiktheid dy't fêststeld is troch in dokter of psycholooch;
- as jo bern ynskreaun stiet op in skoalle yn it bûtenlân.
Fervangende learplicht
It kin wêze dat jo bern net oan de folsleine learplicht of kwalifikaasjeplicht foldwaan kin. Yn dat gefal is ferfangende learplicht wierskynlik in opsje. Ferfangende learplicht is allinnich foar bern fan 14 jier en âlder. It is in apart leartrajekt dat oanslút by de persoanlike situaasje fan jo bern. Der binne ferfangende leartrajekten foar de folsleine learplicht, en ek foar de kwalifikaasjeplicht.
Bysûnder ferlof learplicht
As jo bern nei skoalle giet, moat hy of sy op de oanjûne tiden de lessen folgje. Yn in oantal gefallen kinne jo bysûnder ferlof (maksimaal 10 skoaldagen per skoaljier) krije:
- by in wetlike ferplichting dy't net bûten skoaltiden barre kin;
- by in ferhuzing;
- by in houlik fan bloed- en oanbesibbenen (oant en mei de fjirde graad);
- by in ferstjerren fan bloed- en oanbesibbenen (oant en mei de fjirde graad);
- by in earnstige sykte fan bloed- en oanbesibbenen (oant en mei de fjirde graad);
- by in befalling fan de mem, fersoargster of fâdes;
- by houliksjubileum (12½, 25, 40, 50 of 60 jier) fan bloed- en oanbesibbenen (oant en mei de fjirde graad);
- by kalamiteiten, bygelyks brân;
- foar in oare wichtige reden dêr't de skoaldirekteur mei ynstimt.
Ekstra fakânsjeferlof
Binne jo fanwegen jo wurk net yn steat om mei jo bern op fakânsje te gean binnen de skoalfakânsje? Dan kinne jo ekstra fakânsjeferlof oanfreegje. Dit stiet los fan it bysûndere ferlof dat foar elk bern jildt. Jo kinne per skoaljier maksimaal tsien ekstra fakânsjedagen oanfreegje. Dit kin net yn de earste twa leswiken fan it nije skoaljier. Jo moatte op syn minst acht wiken fan tefoaren jo oanfraach skriftlik yntsjinje by de direkteur fan de skoalle.
Foartidich skoalleferlitte
In foartidich skoalleferlitter is immen tusken de 17 en 23 jier dy't net mear nei skoalle giet en gjin startkwalifikaasje hat. In startkwalifikaasje is in havo-, vwo- of mbo2-diploma. In vmbo-diploma is gjin startkwalifikaasje. Foartidige skoalleferlitters kinne in persoanlike begelieder krije fia de Regionale Meld- en Koördinaasjefunksje (RMC). Dizze begelieder helpt mei it finen fan in oplieding of (learwurk)baan.