Mear as € 1 miljoen ekstra foar duorsumens en restauraasje fan it Frysk erfgoed
De provinsje Fryslân, it Nationaal Restauratiefonds en in Frysk privaat fûns stelle tegearre €1,35 miljoen ekstra beskikber foar it Kultuerfûns foar Monuminten yn Fryslân. Fanôf febrewaris 2025 kinne eigners wer in liening tsjin geunstige betingsten oanfreegje by it Restauratiefonds foar it ferduorsumjen, restaurearjen en/of werbestimmen fan lokaal beskerme monuminten yn Fryslân.
It Kultuerfûns foar Monuminten Fryslân stipet eigners fan lokaal beskerme monuminten, lykas gemeentlike en byldbepalende panden. Hjirrmei jouwe wy in ympuls oan in oantreklike en leefbere omjouwing. Yn de ôfrûne 20 jier hat it fûns yn Fryslân hast 6 miljoen euro oan lieningen mei lege rinte ferstrekt. Sa hat bygelyks de Suvelfabryk yn Ljussens in nije bestimming krigen. De storting yn it fûns (€1.000.000,- fan de provinsje en de matching fan €250.000,- troch it Restauraasjefûns) slute oan by it duorsumens- en erfgoedbelied fan de provinsje Fryslân.
Eke Folkerts, deputearre Erfgoed foar de provinsje Fryslân: “Troch gear te wurkjen mei it Kultuerfûns en it Restauraasjefûns kinne wy eigners finansjeel mear perspektyf jaan. Dit is wichtich foar it behâld en it libben hâlden fan ús erfgoed en tagelyk drage wy sa by oan de ferduorsuming fan monuminten en de enerzjytransysje. It is wichtich dat ús erfgoed meikomme kin yn de takomst. In soad moaie inisjativen binne mei troch dit fûns fierder kommen. Wy hoopje dat der mear folgje meie.”
Grutte belangstelling
Troch de grutte belangstelling foar in liening út it fûns is dit ekstra bedrach foar it fûns tige wolkom. Sa kinne wy op 'e nij eigeners fan lokaal beskerme erfgoed yn Fryslân stypje by harren plannen. Dêrneist draacht dizze duorsume finansieringsfoarm ek by oan de kontinuïteit fan dit fûns. Om't rinte en ôflossing weromfloeie yn it fûns, kinne ek oare eigeners wer holpen wurde by de restauraasje en ferduorsuming fan harren pân.
“Mear monumintbesitters finansjeel stypje om harren monumint klear te meitsjen foar de takomst. Dêr sette wy ús deistich foar yn. Dêrom binne wy bliid mei dizze bydrage fan de provinsje en in Frysk privaat fûns oan it Kultuerfûns foar Monuminten Fryslân. Wy binne grutsk op dizze gearwurking”, sa seit Uğur Özcan, direkteur/bestjoerder fan it Nationaal Restauratiefonds.
Kultuerfûns foar Monuminten Fryslân
It fûns is in inisjatyf fan it Kultuerfûns en it Nasjonaal Restauraasjefûns. De provinsje is de grutste partner. Eigners yn de provinsje Fryslân kinne de Kultuerfûns-hypoteek mei lege rinte fanôf febrewaris 2025 oanfreegje by it Restauraasjefûns. De hichte fan de hypoteek wurdt bepaald oan de hân fan de troch de gemeente fêststelde kosten. De rinte en ôflossing wurde weromstort yn it monumintenfûns. Mear ynformaasje stiet op de webside fan it Restauraasjefûns.
Cathelijne Broers, direkteur Kultuerfûns: “Dizze gearwurking makket it mooglik om mei in revolvearjend fûns bliuwend ynfloed te meitsjen. Mei tank oan de rinte en ôflossing kinne wy hieltyd mear eigners helpe om harren monumint takomstbestindich te meitsjen. Lokaal beskerme pearels dy't de regio karakter jouwe fertsjinje dizze oandacht, sa as dat sa moai bart yn de provinsje Fryslân."
