Undertekening Werbesinning fan de regionale Wenôfspraken
Hjoed wie yn Ljouwert de ûndertekening fan de herfoarming fan de Fryske regionale wenningdeals. Wethâlder Marcel van Opzeeland wie hjirby oanwêzich út namme fan de gemeente Opsterlân.
Wethâlder Marcel van Opzeeland:
“Gemeente Opsterlân is der klear foar, de kommende jierren sille wy folop nije wenten bouwe. Mar de faasje wêrmei't wy bouwe kinne, wurdt troch it Ryk remme. Mei it ûndertekenjen fan de herfoarming fan de Fryske Wenningdeals dogge wy as gemeente Opsterlân op 'e nij in oprop oan it Ryk: los de knelpunten op dy't wenningbou behinderje. Tink bygelyks oan de stikstofproblematyk en it oerfolle elektrisiteitsnet. Dizze problemen moatte op nasjonaal nivo oplost wurde, oars bliuwe wenningbouplakken lykas yn Bakkeveen, dat grinzget oan in Natura2000-gebiet, op slot sitten. Wy wolle troch. Opsterlân is der klear foar. No it Ryk noch.”
Parseberjocht Provinsje Fryslân
Undertekening Werbesinning fan de regionale Wenôfspraken
De Fryske gemeenten en de Provinsje Fryslân ûndertekenje hjoed, tidens de earste Fryske Wentafel, de herfoarming fan de Fryske regionale wenningdeals. Dit binne ôfspraken tusken gemeenten, provinsje en it Ryk. Yn de oarspronklike wenningdeals wie ôfsprutsen dat der oant en mei 2030 sa'n 17.500 nije wenten boud wurde soene. Mei dizze herfoarming komme dêr 4.686 wenten by, wêrmei't it totaal útkomt op 22.406 nijbouwenten yn Fryslân.
De dynamyk fan sawol de stêden as it plattelân foarmet hjirby in wichtich útgongspunt. Ferspraat oer Fryslân drage talloze wenningbouprojekten by oan de wenningbou-opjefte én oan de leefberens fan doarpen en stêden. It is dêrby fan belang om de unike skaaimerken fan Fryslân te behâlden. Dit slút oan by de Fryske aard en skaal. In goede balâns tusken betelbere keapwenten, sosjale hier en oare wenfoarmen is essinsjeel om yn de ferskate wenbehoeften te foarsjen. Yn de provinsje wurdt derop ynset om twa tredde fan de nijbouwenten te realisearjen yn it betelbere segmint.
Spesifyk foar de Fryske oanpak is de rjochte omtinken foar ynnovaasjes op it mêd fan sirkulêr, yndustrieel en biobased bouwen. Mar der dogge har by it realisearjen fan de winske resultaten ek knelpunten foar, lykas netkonzjestje en de stikstofproblematyk. Bliuwende omtinken foar dizze kwestjes is essinsjeel om foarútgong te bliuwen boeken.
De regionale wenningdeals kinne meibewege mei de ûntwikkelingen yn de provinsje. Dêrom wurde se elk jier op 'e nij besjoen: wat giet goed, wat kin better, en wat is der feroare? As it nedich is, wurde de ôfspraken oanpast. Sa soargje wy derfoar dat de plannen bliuwe oansluten by wat Fryslân écht nedich hat op it mêd fan wenjen.
