WOZ-wearde en taksaasje

Hoe kinne jo beswier meitsje?

Kloppet neffens jo de WOZ-beskikking net? Dan kinne jo it bêste earst belje mei it Publykssintrum. Jo kinne ek binnen seis wiken nei dagtekening fan it oanslachbiljet skriftlik beswier meitsje. Jo kinne hjirfoar ek gebrûk meitsje fan it beswierformulier. Dit kinne jo ynfolje fia Myn Opsterlân troch yn te loggen mei jo DigiD (jildt net foar oanslaggen op namme fan bedriuwen). Yn jo beswierskift moatte jo it oanslachnûmer, de belestingsoarte en de reden fan it beswier fermelde.

Jo kinne ek hiel ienfâldich beswier meitsje fia:

Sels WOZ beswier meitsje

De gemeente Opsterlân is oansletten by dit inisjatyf. 

As jo beswier meitsje, bliuwt de betellingsferplichting bestean. Jo kinne wol yn it beswierskift freegje om útstel fan betelling foar it bedrach dêr't jo beswier tsjin meitsje. It (oerbleaune) bedrach fan de oanslach moatte jo binnen de op it oanslachbiljet neamde ferfalterminen betelje. Wurdt jo beswierskift grûndearre ferklearre, dan krije jo it  tefolle betelle bedrach werom.

As jo it net iens binne mei de útspraak op it beswierskift, dan kinne jo noch yn berop gean by de sektor Bestjoersrjocht, Belestingaken, fan de Rjochtbank yn Ljouwert. Hjirfoar wurdt mear ynformaasje jûn yn de útspraak op it beswierskift.

Jo wolle in buro ynskeakelje om beswier te meitsjen. Mei dat?

Jo meie in buro ynskeakelje om beswier út jo namme te meitsjen. Mar wannear't jo in buro ynskeakelje om (fergees) te helpen, binne dêr kosten oan ferbûn foar ús. Dizze kosten komme yndirekt wer by jo telâne, om't wy se ferwurkje yn it taryf foar de ûnreplik guodbelesting. De buro's claimje nammentlik foar elk terjochte beswier in kostenfergoeding tusken de € 700,- en € 1000,- euro. Al dy kosten soargje yn de takomst wer foar ferheging fan de OZB-oanslach.

Wolle jo op in oare manier beswier yntsjinje? Meitsje dan gebrûk fan it platfoarm selswozbeswiermeitsje.nl. De gemeente is hjirby oansletten, om't beswier meitsje fia dit buro amper kosten mei him meibringt. Mar De bêste en meast maklike manier om beswier te meitsjen, is fia it online beswierformulier fia Myn Opsterlân of fia in formulier dat jo ophelje kinne by de baly fan it gemeentehûs. Wy helpe jo der graach mei en nimme jo beswier serieus!

Ik haw ferline jier beswier makke en no is myn WOZ-wearde foar dit jier wer stegen

Elk jier op 'e nij wurdt de WOZ-wearde op 'e nij bepaald mei ferkeapsifers fan ferlykbere wenningen. Sa folget de WOZ-wearde de ûntwikkelingen op 'e wenningmerk. Hawwe jo ferline jier beswier makke tsjin de WOZ-wearde en is dizze doe ferlege? Dan is de ferlege WOZ-wearde fan ferline jier it útgongspunt, mar stiget de WOZ-wearde wol mei mei de stegen hûzeprizen.

Hoe is de wearde op de beskikking ta stân kommen?

Om de WOZ-wearde fan jo ûnreplik guod te bepalen, sjocht de gemeente nei de wearde op 1 jannewaris 2024. Dit is de weardepeildatum. De tastânsdatum is gelyk oan de weardepeildatum, útsein as jo ûnreplik guod yn de rin fan 2024 feroare is troch bygelyks ferbou, oanbou of sloop. Dan sjocht de gemeente nei de situaasje fan it pân op 1 jannewaris 2025. Dit is dan de tastânsdatum. De gemeente rekkent dizze nije wearde werom nei it priisnivo fan 1 jannewaris 2024.

Wy fergelykje jo wenning mei ferlykbere wenningen dy't ferkocht binne yn 2023 en yn de earste moannen fan 2024. Dit hjit de ferlikingsmetoade. Jo wenning kin wol ferskille fan de wenningen dêr't wy mei fergelykje. Bygelyks yn lizzing, grutte, boukundige steat, kwaliteit of ûnderhâldstastân. Mei dy ferskillen hâlde wy rekken.

Wat is de weardefêststellingsdatum?

De gemeente stelt de WOZ-wearde fêst op basis fan it ferkeapnivo op 1 jannewaris fan it foargeande jier. Dit is de weardefêststellingsdatum. De weardefêststellingsdatum foar belestingjier 2025 is dus 1 jannewaris 2024.

Wat is in tastânsdatum?

Tusken de weardefêststellingsdatum en it belestingjier sit in jier tiid. It kin wêze dat der yn dizze perioade wizigingen oanbrocht binne oan in wenning of pân, lykas (fer)bou, wiziging fan bestimming of sloop. Yn dat gefal wurdt de WOZ-wearde fêststeld op basis fan de steat fan de wenning of it pân oan it begjin fan it belestingjier. De weardefêststellingsdatum is dan de tastânsdatum 1 jannewaris 2025.

Hoe bepaalt de gemeente it gebrûksoerflak?

It gebrûksoerflak is berekkene mei help fan in 3D-programma of bouwkundige tekeningen dy't oanwêzich binne by de gemeente. Ek binne der wenningen op it plak sels opmetten.

Hoe kin de wearde fêststeld wêze sûnder dat ik in taksateur sjoen haw?

Foar it fêststellen fan de wearde fan wenningen wurdt gebrûk makke fan aktuele ferkeapsifers en by net-wenningen ek fan hiersifers fan fergelykbere (referinsje) wenningen of pannen. Wy brûke allinnich kontrolearre sifers fan wenningen of pannen dêr't wy genôch ynformaasje fan hawwe. Sadat it taksaasjesysteem in goede ferliking meitsje kin mei jo wenning as it giet om skaaimerken lykas kwaliteit, ûnderhâld, oerflak, útstrieling, lizzing en wenningtype. Fansels kontrolearje wy taksaasjes en passe wy dy dêr't nedich oan. Sa ûntstiet in betroubere taksaasje en is it net nedich om elke wenning te besykjen.

De taksaasjes fine plak neffens de regels dy't yn de Wet WOZ fêstlein binne. De Waarderingskamer hâldt tafersjoch op in juste útfiering fan de weardebepaling.

Hoe komt de gemeente oan de referinsjewenningen op it taksaasjeferslach?

Yn it taksaasjeferslach steane meastentiids trije wenningen dy't it meast lykje op jo hûs. Dit binne de referinsjewenningen. Soms binne der gjin deselde wenningen yn de direkte omjouwing ferkocht. Dan sjocht it taksaasjesysteem nei fergelykbere wenningen fan in oar type, dy't wat jonger of âlder binne of dy't yn in oar doarp steane.

De wearde fan jo wenning is net allinnich basearre op de wenningen yn it taksaasjeferslach. Alle beskikbere ferkeapsifers wurde deryn meinaam.

Hoe binne de fergelykbere objekten bepaald of wannear is in wenning in referinsjewenning?

Alle wenningen dy't ferkocht binne om de weardefêststellingsdatum fan 1 jannewaris 2024 hinne, binne ûndersocht oft se geskikt binne as referinsjewenning. De referinsjewenningen ferskille wat lizzing, grutte, bouperioade en wenningtype oanbelanget. It taksaasjesysteem selektearret de ferkochte wenningen dy't lykje op jo wenning. Dizze wurde oan jo wenning keppele as referinsje. Soms binne der oare wenningen ferkocht dêr't jo wenning better mei fergelykber is. En blykt dat mei de bettere referinsjes de wearde te heech fêststeld is. Dan kinne wy de wearde oanpasse en ferleegje.

Wêrom is de wenning fan myn buorlju leger wurdearre?

Dat kin bygelyks lizze oan it feit dat jo wenning grutter is, op in grutter perseel leit of better ûnderhâlden is. Faak leit it ferskil yn de ûnderdielen/bygebouwen. Miskien hat de iene wenning wol in oanbou, dakkapel of oerkaping en de oare net. As it eksakt gelyk is, dan moat dit útsocht wurde troch de taksateur.

Is de wearde fan myn wenning ek fêststeld op de weardefêststellingsdatum 1 jannewaris 2024 as myn wenning pas nei dizze datum oplevere is?

Wannear't de wenning yn it jier foarôfgeand oan it belestingjier oplevere is, dan jildt de tastânsdatum as weardefêststellingsdatum. De tastânsdatum foar it belestingjier 2025 is 1 jannewaris 2025. De WOZ-wearde wurdt yn dit gefal fêststeld op basis fan de steat fan de wenning of it pân oan it begjin fan it belestingjier.

Is yn de weardefêststelling myn ferbouwing, dakkapel of nije skuorre ek meinaam?

Op grûn fan de Wet wurdearring ûnreplik guod (WOZ) is de gemeente ferplichte om de wearde fan wenningen en pannen ek te bepalen op de tastânsdatum 1 jannewaris 2025. Dizze wearde wurdt fergelike mei de wearde op de weardefêststellingsdatum fan 1 jannewaris 2024. By in ferskil yn wearde tusken de weardefêststellingsdatum en de tastânsdatum, jildt de tastânsdatum. Sa wurdt ek de wearde fan jo ferbouwing, dakkapel of nije skuorre meinaam yn de WOZ-wearde.

Wêr wurdt de wearde op de WOZ-beskikking foar brûkt?

De gemeente brûkt de WOZ-wearde om te bepalen hoefolle ûnreplik-saakbelesting (OZB) jo betelje moatte.  

Oer alle wenningen en pannen (ek wol ûnreplik guod neamd) moat OZB betelle wurde.  

De Belestingtsjinst brûkt de WOZ-wearde om it eigenwenningfoarfeit foar de ynkomstebelesting te bepalen en om de fermogensrendemintsbelesting foar twadde wenningen te bepalen.

It wetterskip brûkt de WOZ-wearde foar it bepalen fan de wetterskipsbelesting (ûnderdiel wettersysteemheffing boud).

Wêrom ûntfang ik in weardebeskikking foar in wenning of pân dat noch yn oanbou is?

Op grûn fan de Wet wurdearring ûnreplike saken (WOZ) is de gemeente ferplichte om de wearde fêst te stellen fan noch net ôfboude en ree melde wenten en net-wenten. By de heffing fan de OZB sil dizze wearde brûkt wurde as de heffingsgrûnslach foar de OZB.

Wat is in WOZ-beskikking op fersyk?

It ûntfangen fan in WOZ-beskikking betsjut net automatysk dat jo ek belestingplichtich binne. Of oarsom: dat as jo gjin WOZ-beskikking ûntfange, jo net belestingplichtich binne. As jo bygelyks nei 1 jannewaris fan it belestingjier in wenning keapje, ûntfange jo net automatysk in WOZ-beskikking. It kin ek wêze dat der meardere eigners binne en de gemeente de WOZ-beskikking net stjoert nei de eigner dy't de belestingsaken ôfhannelet.

Hawwe jo noch net earder in WOZ-beskikking ûntfongen, dan kinne jo hjirfoar in fersyk by de gemeente yntsjinje. Sa hawwe jo as belestingplichtige ek de mooglikheid om beswier te meitsjen.

Jo hawwe noch gjin oanslachbiljet gemeentlike belestingen en WOZ-wearde ûntfongen. Wannear kinne jo dizze ferwachtsje?

Yn febrewaris ferstjoert de heffingsamtner it oanslachbiljet gemeentlike belestingen mei dêrop de WOZ-wearde. Hawwe jo noch gjin beskikking en oanslach ûntfongen, dan komt dizze nei ferwachting ein april.

Wêrom is myn WOZ-wearde, nettsjinsteande de sakjende hûzeprizen, safolle stegen?

De wearde fan jo wenning of pân wurdt elk jier op 'e nij bepaald. De WOZ-wearde 2025 is basearre op de aktuele ferkeapprizen fan fergelykbere (referinsje) wenten yn de perioade 1 jannewaris 2023 oant en mei 30 juny 2024. De wenningmerk wie yn de earste kwartalen fan 2023 noch folop yn beweging mei hieltyd hegere prizen. Dat feroare letter yn sakjende prizen fanwege de ferskate ûntwikkelingen lykas de hegere hypoteekrinte. Yntusken stige de prizen wer en komt it oerbieden fan de fraachpriis ek wer faker foar. De WOZ-beskikking giet út fan de wearde fan jo wenning op 1 jannewaris 2024. De gemiddelde feroarings fan de hûzeprizen binne yn dy wearde ferwurke. Neffens de Waarderingskamer is tusken de weardepeildatum 1 jannewaris 2023 en de weardepeildatum 1 jannewaris 2024 sprake fan in lanlik gemiddelde stiging fan de WOZ-wenningwearde mei 5,4%. Ofhinklik fan de lokaasje en it type wenning kin dit by de taksaasje heger of leger útfalle.