Frieschepalen
Fryske Peallen (Fryske Peallen) leit tsjin de grins mei de provinsje Grinslân en njonken de doarpen Sigerswâld en Oerterp. Fryske Peallen is yn de 18e iuw ûntstien as ûntginningsdoarp yn it heechfeangebiet. It doarp leit oan Rykswei A7 fan It Hearrenfean nei Grins.
Mei de peallen yn de doarpsnamme wurde de grinspeallen by de grins mei Grinslân lâns bedoeld. Fryske Peallen is pas yn 1953 beneamd ta selsstannich doarp. Foar dy tiid makke Fryske Peallen diel út fan Sigerswâld.
Skiednis
Fanôf likernôch 1660 waard de Grutte Feanfeart nei Bakkefean groeven om de feanen yn it noardeasten fan Opsterlân eksploitearje te kinnen. By Fryske Peallen makke dizze feart mei ferlaat en ophelbrêge in bûging nei it súdeasten. Der stiene inkele huzen en in herberch. De feart is tichtmakke en no is de Tolheksleane de haadader fan it doarp, in leane mei moaie ikebeammen en bebouwing fan benammen frijsteande wenten, inkele pleatsen en in tsjerkje mei dakruter út 1928.
By Fryske Peallen binne ek de resten fan in skâns yn it lânskip te finen. Yn it begjin fan de Tachtichjierrige Oarloch moast de rêst yn Fryslân ferdigene wurde mei help fan skânsen op strategyske plakken. Oan de ein fan de 16e iuw waard der ek in eksimplaar by it hjoeddeistige Fryske Peallen opwurpen. De skâns is oan syn lot oerlitten, yn 1672 wer opmakke en dêrnei ferfallen.
