Langezwaag
Langezwaag (Langsweagen) leit oan de wei fan De Gordyk nei Hearrenfean. It doarp leit op de grins tusken sân- en feangrûnen. It doarp is omjûn troch greiden mei beamwâlen en beammen. Langezwaag leit yn de súdwestlike punt fan de gemeente Opsterlân.
Turf en lânbou
Om 1550 hinne begûn de Hearren Kompanjy yn Hearrenfean mei it ôfgraven fan heechfean. Se groeven de Skoatterlânske Kompanjonsfeart (Schoterlandse Compagnonsvaart) mei in protte sydtakken om turf nei Hollân te ferfieren. De haadwei rûn fan east nei west, fan Hearrenfean fia Lúkswâld en Langezwaag nei De Gordyk. Dizze Hegedyk wie net allinnich in wei, mar ek in dyk om it wetter tsjin te hâlden. Noardlik fan de Hegedyk ûntstienen grutte plassen nei it ôfgraven fan it fean. Troch diken oan te lizzen, waarden dizze plassen drûchlein en geskikt makke foar lânbou en greiden. De namme Langezwaag ferwiist nei de langhalige stikken lân (swagen) dy't eartiids fan it rivierke de Alde Ie yn it noarden oant foarby de Skoatterlânske Kompanjonsfeart yn it Suden rûnen.
Boerelibben
Langezwaag is ien fan de âldere doarpen yn de gemeente Opsterlân. Dizze doarpen waarden benammen bewenne troch boeren, dy't foaral rogge en boekweet ferbouden. Se hiene ek kij en skiep, dy't benammen holden waarden foar de dong.
