Maaija de Roos
Dizze bysûndere dei stiet hielendal yn it teken fan jimme tegearre. En trouwe kinne jo hast oeral, jo hawwe allinnich in trouamtner nedich. En lit ik dat no wêze. Jo soene sizze kinne: ik bin in troufrou, want bûtengewoan amtner fan de boargerlike stân (BABS) is sa'n mûlfol. Yn jimme gefal is dat binnen de gemeente Opsterlân, miskien yn it moaie Lycklamahûs te Beetsterzwaach.
It giet oan! Ja sizze…
As ik de eare krij en jimme plechtichheid fersoargje mei, dan is it fansels nedich om inoar wat better kennen te learen. Graach kom ik dan by jimme thús om te hearren wat jimme wichtich fine yn it libben. Jimmme bern, hobby's, húsdieren, wurk, famyljebannen en freonen passearje de revu tusken tal fan oare persoanlike saken. Mei dy ynformaasje kin ik in trouspeech meitsje dêr't jimme jimme yn werkenne en dêr't fleurigens de boppetoan fiert en ûntroering binnen hânberik leit.
En de leafde is krekt as de natuer, moai yn alle jiertiden mei friezen, teien, bloeien, ôfstjerren en opnij ta bloei kommen. It is jimme dei dus pas ik my graach oan jimme winsken oan. De speech is de opmaat om jimme folmondich JA hearre te sizzen. Dat is ommers jimme doel om tegearre it fierdere libbenspaad te bewanneljen. Ik soe it in eare fine as ik in lytse rol spylje mei op jimme bysûndere dei.
Ik sil my dêrom koart foarstelle. Ik bin Maaija de Roos, berne 1 maart 1965 yn Kollumersweach. Ik wenje yn Easterwâlde, bin troud en mem. Ik hâld fan minsken, bisten en de natuer. Al sûnt 1984 wurkje ik yn de finansjele wrâld, wit in protte fan minsken mar dêr kin (en wol) ik nea oer prate, bankgeheim! Ik bin aktyf foar en yn de natuer, wie jierrenlang belutsen by it Fryske Gea en bin bestjoerslid fan it Kultuerfûns. Oare hobby's binne; wyn & spiis, lêze, hynsteride, farre en motorride. Myn natuerlike ynteresse yn minsken makket dat ik graach troufrou wurde woe.
Freonen sizze; “dat is dy op it liif skreaun, krekt wat foar dy”. Jimmme oerwagings om tegearre fierder te gean en dat te dielen mei jimme gasten is by in houliksplechtichheid 100% oanwêzich. Mei de beëdiging as troufrou mei ik aanst alles fertelle wat jimme my oanreikke. Fansels sil ik der alles oan dwaan om dit ûnderdiel fan jimme dei ûnferjitlik te meitsjen, yn 't Frysk, Nederlânsk, Dútsk of Ingelsk, sadat jimme der oer 5, 12,5 of 25 jier noch mei wille oan weromtinke.
Graach oant sjen, bis bald, hope to see you en foaral OANT SJEN.
