11. (Fm.) Dopertske tsjerke
De yn 1939 boude doopsgesinde tsjerke oan de Stationswei yn Gordyk wie de opfolger fan in doopsgesinde tsjerke oan de Langewâl. Op 15 augustus 1939 waard der in fergunning ferliend foar de bou fan in tsjerkegebou oan de Stationswei foar rekken fan de doopsgesinde gemeente Gordyk-Lippenhuzen. De boukosten waarden rûsd op sa'n 15.000 gûne. De tsjerke waard op 7 april 1940 yn gebrûk nommen.
Tsjerkebeskriuwing:
- Lizzing: Yn wenwyk
- Jiertal: 1939
- Boutype: Sealtsjerke
- Oerflak: 215 m2
- Denominaasje: Doopsgesind
- Hjoeddeistige funksje: Wenje
Skaaimerken fan de tsjerke
| Eigner | Partikulier |
| Adres, postkoade | Stationswei 60, 8401 DP |
| Monumintstatus | Gjin |
| Arsjitekt | T. van der Kooi |
| Boustyl | Amsterdamske skoalle/Ekspresjonisme |
| Fêste objekten en muorkunst | Gjin |
| Begraafplak | Nee |
| Terrien | Fjouwerkant perseel foar in part omjûn troch beukehage en foar in part troch in sleat. |
| Berikberens en parkeargelegenheid | Beheinde berikberens fanwege lokaasje. Der is genôch parkeargelegenheid yn de wenwyk |
| Boarnen | Frysk Fotoargyf Dossier gemeente Opsterland |
It ferhaal fan de Minniste tsjerke
De yn 1939 boude doopsgesinde tsjerke oan de Stationswei yn Gordyk wie de opfolger fan in doopsgesinde tsjerke oan de Langewâl. Op 15 augustus 1939 waard der in fergunning ferliend foar de bou fan in tsjerkegebou oan de Stationswei foar rekken fan de doopsgesinde gemeente Gordyk-Lippenhuzen. De boukosten waarden rûsd op sa'n 15.000 gûne. De tsjerke waard op 7 april 1940 yn gebrûk nommen.
It tsjerkegebou is ûntwurpen troch T. van der Kooi. De T-foarmige rjocht sletten sealtsjerke is oplutsen út brúngiele bakstien en hat yn de foargevel in rûnbôgegevel mei houten rûnbôgedoar en twa smelle stripen glês-yn-lead mei ferskate kleuren glês. Oan beide siden fan de doar binne trije smelle rjochthoekige glês-yn-lead ramen oanbrocht. De yngong hat twa heakske muorkes op de foargevel. Ek boppe de doar binne trije gruttere, smelle rjochthoekige ramen mei glês-yn-lead te sjen. Beide sydmuorren hawwe elk fjouwer steunbearen. Yn de muorflakken tusken elk fan de steunbearen en yn de oergong nei it efterste diel ek searjes fan 3 ramen mei glês-yn-lead. Yn de linker sydmuorre fan it efterste diel fan de tsjerke is ek in rûnbôgedoar fan lakke hout oanwêzich. De rjochter sydmuorre fan dit diel hat fiif smelle ramen.
It sealtek fan sawol it skip fan de tsjerke as it heaks dêrop boude efterste diel is bedutsen mei swarte glazuere dakpannen. Neffens de foarste nok op it dak in fjouwerkante, mei sink beklaaide dakruter mei in nuddelfoarmige spits, dy't 45° draaid is ten opsichte fan it grûnplan fan de tsjerke. Op de toerpylder in bol mei dêrop in wynwizer yn de foarm fan in fûgel of do.
It plafond bestiet út in spitsfoarmich tonferwulf mei spitsfoarmige spanten. De binnenmuorren binne wyt bepleistere mei in bakstiennen lambrisearring. In nis yn de eftermuorre fan it skip dêr't earder it oargel stie, is ek spitsfoarmich en slút oan by de plafondfoarm.
It oargel fan de doopsgesinde gemeente waard yn 1882 levere troch Bakker en Timmenga út Ljouwert. Doe't it gebou yn 1940 yn gebrûk nommen waard, waard it oargel meiferhuze út it âldere tsjerkegebou wei. It front waard doe fernijd. It meganyske sleepkist-oargel waard restaurearre yn 1970.
Yn 2018 waard de tsjerke sletten fanwegen in tebekgong yn it ledetal. De minniste gemeente Gordyk-Lippenhuzen telde op dat stuit sa’n 30 leden. It tsjerkegebou waard ferkocht en docht tsjintwurdich tsjinst as wenning.