Undersyk trochstreamlokaasje De Twirre

Moat de gemeente dit dwaan of mei de gemeente dit dwaan?

De gemeente hat ferskate wetlike taakstellings op it mêd fan opfang en húsfesting fan minsken dy't nij yn Nederlân kommen binne.

Al jierrenlang hat de gemeente in taakstelling foar de húsfesting fan statushâlders. Dit binne minsken dy't in ferbliuwsfergunning krigen hawwe. Sy krije úteinlik in wenning yn ús gemeente of yn in oare gemeente. Neireizgers telle mei yn dizze taakstelling. Sy komme der dus net ekstra boppe-op.

Sûnt 2024 is der de Spreidingswet, dy't bepaalt hoefolle asylsikers eltse gemeente opfange moat. Asylsikers wachtsje op in status, sy witte noch net oft se bliuwe meie. De gemeente Opsterlân moat neffens de Spreidingswet 173 asylsikers opfange. Op dit stuit foldogge wy hjir net oan. 

De gemeente kiest derfoar om dizze taak yn te foljen troch trochstreamlokaasjes foar statushâlders te meitsjen yn stee fan asylopfang. Statushâlders bliuwe no faak lang yn in AZC wenjen om't der noch gjin wenning beskikber is. Dizze minsken kinne dus ek noch net begjinne mei harren yntegraasje en hâlde plakken beset yn de AZC's.

Troch statushâlders tydlik te húsfestjen yn in trochstreamlokaasje, komme der plakken frij yn de AZC's. Dêrmei ûntlêste wy de asylopfang én jouwe wy op in oare manier ynfolling oan ús ferplichting út de Spreidingswet wei. 

De minsken yn de trochstreamlokaasje wurde dêrnei húsfest yn de gemeente of omlizzende gemeenten. De trochstreamlokaasje soarget dus net foar ekstra húsfesting. 

Sûnt 2022 hawwe gemeenten ek de taak om Oekraynske flechtlingen op te fangen. 

Op basis fan hokker wet- en regeljouwing is dit tastien? 

De Rijksoverheid hat in regeling foar it opsetten fan trochstreamlokaasjes beskikber steld foar gemeenten. Dêrneist hat de Rijksoverheid de Spreidingswet ynfierd. De Spreidingswet is dus in wichtige wet by dit ûnderwerp. Dêrneist binne alle gemeenten yn Nederlân ferplichte om minsken dy't in ferbliuwsfergunning hawwe te helpen oan in sosjale hierwenning. Dy ferplichting hawwe gemeenten foar alle ynwenners dy't foar in sosjale hierwenning yn oanmerking komme en dêr hearre statushâlders ek by.

It belied rûn asyl en migraasje is op it stuit in soad yn it nijs. Der wurde ferskate wizigingen foarsteld, mar dizze binne noch net definityf. Wy wurkje dêrom op dit stuit neffens de jildende wet- en regeljouwing. Sadree't nije regels of regelingen definityf wurde, besjogge wy wat dit betsjut foar ús as gemeente.

Wurdt der wat dien mei fragen en soargen? 

Ja, de fragen dy't ynwenners ús stelle en de soargen dy't sy uterje nimme wy mei yn ús ûndersiken.  De ôfrûne perioade hawwe wy de soargen fan ynwenners sammele en hjir ferskate aksjes op útfierd. In diel fan de soargen giet oer de mooglike lokaasje, oare soargen geane oer de ûnrêst en oerlêst dy't ynwenners no al ûnderfine yn it doarp, bygelyks troch jongerein.

Wat is it ferskil tusken draachflak en draachkrêft?

As wy sjogge nei de draachkrêft fan in doarp dan bedoele wy oft der genôch foarsjenningen binne en oft de sosjale basis goed op oarder is. Dus oft der winkels, ferienings, hûsartsen, in skoalle en bedriuwen binne dêr't statushâlders wurkje kinne of ferienings dêr't se frijwilligerswurk dwaan kinne. Ek sjogge wy oft der minsken yn it doarp binne dy't dizze minsken op wei helpe kinne. Draachflak hat betrekking op de miening fan de ynwenners. Fine ynwenners in bepaald plan wol of gjin goed idee? Draachflak is lykwols lestich te mjitten, om't ynwenners faak útinoarrinnende mieningen hawwe. 

De Twirre wie net te rêden. Dat wie in pear jier lyn it boadskip. Wêrom ûndersiket de gemeente in gebou dat net te rêden is? 

Yn 2022 hat de gemeenteried besletten dat de Twirre net mear geskikt wie as skoalgebou. It gebou wie ferâldere, te grut foar it tal learlingen en net mear duorsum. Dit betsjut net dat it âlde skoalgebou hielendal nearne mear geskikt foar is. It wie net mear geskikt foar ûnderwiis mar noch wol geskikt, nei ferbouwing, foar tydlike ynfolling fan apparteminten. 

Wat wiene de oarspronklike plannen foar it gebou?

Der wiene gjin oarspronklike plannen foar it gebou.

Wêr sit de gemeente yn it proses? 

Op dit stuit hat in kolleezje fan boargemaster en wethâlders (B&W) in foarstel foarlein oan de gemeenteried. Op 1 desimber besprekt de gemeenteried it foarstel. Op 15 desimber wurdt der oer it foarstel besletten.

It foarstel is no om de lokaasje fan De Twirre te ferbouwen ta 12 apparteminten:

• 6 apparteminten foar statushâlders
• 6 apparteminten foar oare wenningzoekenden

De 6 apparteminten foar de statushâlders foarmje mei-inoar in trochstreamlokaasje dêr't 25 statushâlders tydlik wenje kinne. Mei it realisearjen fan de oare 6 apparteminten komme wy temjitte oan de bredere ferlet oan wenten. De partisipaasjegroep joech ek oan dat it wichtich is dat der wenten komme. De 12 apparteminten en dus ek de trochstreamlokaasje sille maksimaal seis jier bestean. Dêrnei wurdt De Twirre sloopt.

De gemeente brûkt dizze 6 jier om plannen te meitsjen en dizze foar te bereiden

Foarôfgeand oan it foarstel hat de gemeente Opsterlân ferskate mooglikheden foar in trochstreamlokaasje ûndersocht. Op fersyk fan ynwenners is der in partisipaasjetrajekt start. Pleatslik belang en in groep ynwenners fan omlizzende strjitten hawwe fjouwer jûnen meitocht en advys jûn oer wat wichtich is om rekken mei te hâlden foar it doarp. De gemeente hat dêrnei it foarstel opsteld om foar te lizzen oan de gemeenteried.

Is der in plan B?

Der is gjin plan B. Der leit no in foarstel by de gemeenteried. 

Besjocht de gemeente ek in oar pân?

Nee.

Rekken wy parkearplakken kwyt?

Nee.

Komt der noch in ferfolchgearkomste?

 Ja, de ferfolchgearkomste is op 25 novimber. Wy hâlde ynwenners ek op de hichte troch middel fan in nijsbrief dy't wy nei direkte omwenners fan De Twirre stjoere.

Wêrom stiet der gjin hantekening ûnder brieven dy't wy krije?

De brieven dy't wy ferstjoere oer it ûndersyk nei in trochstreamlokaasje binne allegear offisjeel. Net alle brieven hoege fêststeld en ûndertekene te wurden troch it kolleezje fan boargemaster & wethâlders. Guon brieven meie ferstjoerd wurde troch team flechtlingen. De brieven wurde wol altyd troch de boargemaster goedkard. 

Witte wy wêr't minsken wei komme?

Wy witte no net wêr't minsken wei komme. It COA keppelet minsken mei in ferbliuwsfergunning oan in gemeente. Wy hawwe gjin ynfloed op wa't oan ús gemeente keppele wurdt.

Hawwe wy ynfloed op de gearstalling fan de húshâldings? 

Nee, wy hawwe gjin ynfloed op de gearstalling. It COA keppelet minsken oan de gemeente. Wy ferwachtsje in miks fan húshâldings en allinnesteanden. De allinnesteanden wachtsje faak oant harren húshâldingsleden oerkomme kinne út it lân fan komôf.  

Hoefolle minsken komme der te wenjen?

Yn it foarstel no is der plak foar 25 minsken. De gemeenteried nimt in beslút oer dit foarstel. 

Hoe soargje jimme foar yntegraasje?

Wy sille ekstra ynsette op yntegraasje. Statushâlders yn de trochstreamlokaasje starte direkt mei ynboargering. Wy biede taallessen oan en ekstra trainingen rjochte op yntegraasje. Wy sille gearwurkje mei bedriuwen út de omjouwing om minsken sa gau mooglik op wei nei wurk te helpen.

Wêrom kinne asylsikers net wurkje lykas Oekraïners dy't hjirhinne kommen binne?

Asylsikers meie sûnt ein 2023, as se op syn minst 6 moannen yn Nederlân binne, wurkje. Se hawwe dan in wurkfergunning nedich en moatte in eigen bydrage betelje oan de opfang. As in trochstreamlokaasje trochgiet, dan komme dêr gjin asylsikers mar statushâlders. Statushâlders meie altyd wurkje, want sy hawwe in ferbliuwsfergunning. 

Foar hoefolle jier is in trochstreamlokaasje?

Yn it foarstel stiet 6 jier.

Wêr komme minsken te wenjen nei de trochstream?

De statushâlders binne troch it COA keppele oan ferskate gemeenten yn de regio. Mei de regio bedoele wy de gemeente Opsterlân en buorgemeenten. Foar de trochstreamlokaasje yn Beetsterzwaag wurkje wy gear mei Smellingerlân en Weststellingwerf. Dit kinne by dizze mooglike trochstreamlokaasje oare gemeenten wêze. De statushâlders sille nei it ferbliuw yn de trochstreamlokaasje in sosjale hierwenning tawiisd krije yn de gemeente dêr't se oan keppele binne.

Hoe wurkje jimme oan de feilichheid?

Wy ûndersykje altyd ek de omjouwing fan in pân as wy dat brûke wolle. Feilichheid is dêr in ûnderdiel fan. Wy freegje ûnder oare advys hjirfoar oan ús partners lykas de plysje en de feilichheidsregio. Op basis fan dit byld besjogge wy wat der nedich is. De gemeente bliuwt ferantwurdlik foar it behear, tafersjoch en de leefberens.

Hoelang bliuwe minsken?

Wy geane no út fan in jier. Dêrnei moatte minsken ferhúzje kinne nei in wenning. Soms is dat yn de gemeente Opsterlân, mar minsken ferhúzje ek nei ús buorgemeenten lykas Smellingerlân. As immen útstreamd is, wurdt it lege plak wer opfolle.

Hoe kinne minsken binnen in jier útstreame as der foar ús ek gjin wenningen binne?

As de trochstreamlokaasje trochgiet, komme der minsken te wenjen dy't dêrnei yn de gemeente Opsterlân of in buorgemeente wenje sille. Yn de gemeente Opsterlân hawwe wy no ek al, sûnder trochstreamlokaasje, sa no en dan in wenning beskikber foar statushâlders. In lyts part fan de frijkommende sosjale hierwenningen wurdt nammentlik reservearre foar statushâlders. It grutste part fan dizze wenningen wurdt ynfolle troch oare wenningeaskers. Wy tinke dat dit oantal beskikbere wenningen yn ús eigen gemeente, plus de wenningen yn oare gemeenten, genôch is foar statushâlders om binnen in jier te ferhúzjen út de trochstreamlokaasje. 

As der immen útstreamt, komt der dan in nije statushâlder yn?

Ja. 

Hoe sit it mei wenromte foar jongerein en oare doelgroepen?

Wy bouwe yn de gemeente foar elkenien. Op www.opsterland.nl/woningbouw steane de aktuele bouplannen. 

Krije statushâlders foarrang by de huzen? Kloppet dat? 

In part fan de sosjale hierwenningen dy't frijkomme giet nei urgente doelgroepen, dat binne minsken dy't foarrang krije by in sosjale hierwenning. Op dit stuit hearre statushâlders ek by dizze groep. It grutste part fan de frijkommende sosjale hierwenningen giet nei reguliere wenningeaskers.

Wêrom meie wy net yn fakânsjehuzen wenje as der in wenningtekoart is?

Permaninte bewenning fan rekreaasjewenten is yn Nederlân net standert tastien. Dat komt om't rekreaasjewenten in oare bestimming hawwe as reguliere wenten. Fakânsjewenten hawwe de bestimming rekreaasje ynstee fan wenjen. Dêrnjonken moatte rekreaasjewenten oan bepaalde regels en easken foldwaan om geskikt te wêzen foar permaninte bewenning. In lyts tal rekreaasjewenten yn Opsterlân foldocht hjir oan. 

Krije statushâlders hierbeskerming?

As in statushâlder yn in hûs wennet fan de wenningbouferiening, dan jilde deselde regels as foar elkenien. Dus ek de hierbeskerming dy't foar alle ynwenners jildt. Yn in trochstreamlokaasje is dat oars. Dêr is gjin sprake fan in regulier hierkontrakt lykas by in wenningbouferiening, mar in brûklienoverienkomst. Foar sa'n oerienkomst bestiet gjin hierbeskerming. 

Krije statushâlders in passende wenning of krije se faak te grutte huzen? 

As in statushâlder trochstreamt fanút in AZC of in eventuele trochstreamlokaasje nei in hierwenning fan de wenningbouferiening, dan sjocht de wenningbouferiening altyd nei wat in goede match is. Dêrby meitsje se gjin ûnderskied tusken statushâlders en oare doelgroepen. Wenningbouferienings sjogge nei hoe lang immen al op in wachtlist stiet en nei hoe grut in húshâlding is (of hoe lyts) en oft dat passend is by de wenning dy't frijkomt. 

Kin ik planskea yntsjinje as myn hûs minder wurdich wurdt? 

Planskea hjit sûnt 1 jannewaris 2024 neidielkompensaasje. Dat dit feroare is, komt troch de ynfiering fan de Omgevingswet. Mear ynformaasje oer neidielkompensaasje fine jo op https://iplo.nl/thema/ruimtelijke-ontwikkelingen/bijzondere-onderwerpen/nadeelcompensatie

Kin ik beswier meitsje tsjin dizze plannen?

De gemeenteried nimt in úteinlik beslút oer de plannen om in trochstreamlokaasje te realisearjen. Hjirtsjin kin gjin beswier makke wurde.

As wy in fergunning oanfreegje moatte foar de ferbouwing, dan kin hjirtsjin wol beswier makke wurde binnen in bepaalde termyn. Dit giet lykwols allinnich oer de ferbouwing fan it pân en net oer it gebrûk fan de lokaasje as trochstreamlokaasje. Mear algemiene ynformaasje hjir oer fine jo op www.opsterland.nl/beswier-meitsje. 

In oare mooglikheid dan beswier meitsje is ynsprutsen tidens in gearkomste fan de gemeenteried. Mear ynformaasje hjir oer fine jo op de webpagina fan de gemeenteried: www.opsterland.nl/gemeenteried.